پشاور (پاکستان خبر) گورنر خیبرپختونخوا فیصل کریم کنڈی نے کہا ہے کہ مولانا صاحب کو حکومت میں حصہ نہیں ملا، اسی وجہ سے وہ ناراض ہیں، تاہم ان کے بغیر بھی حکومت قائم ہوئی ہے اور آئندہ بھی چلتی رہے گی۔پشاور میں صحافیوں سے گفتگو کرتے ہوئے فیصل کریم کنڈی نے کہا کہ صوبے میں دہشت گردی کے خاتمے کے لیے خفیہ معلومات کی بنیاد پر کارروائیاں جاری ہیں، جن کے نتیجے میں دہشت گردی کے واقعات میں کمی آنے کی توقع ہے۔انہوں نے کہا کہ اگر مخالفین کو پھولوں کا شہر بنا کر تمام بنیادی سہولتیں بھی فراہم کر دی جائیں تو وہ پھر بھی تنقید کریں گے۔ گزشتہ 13 برس کے دوران پیدا ہونے والے مسائل حل کرنے کے لیے موجودہ حکومت اقدامات کر رہی ہے اور کسی کو بھی قانون سے بالاتر نہیں سمجھا جائے گا۔گورنر خیبرپختونخوا کا کہنا تھا کہ صوبے کی بہتری کے لیے مؤثر قوانین بنائے جائیں گے اور ضروری قانون سازی بھی کی جائے گی۔سرکاری ہیلی کاپٹر کے استعمال سے متعلق سوال پر انہوں نے کہا کہ ہیلی کاپٹر گورنر، وزیراعلیٰ اور وزیراعظم کے سرکاری امور کے لیے ہوتے ہیں۔ انہوں نے سرکاری کام کے سلسلے میں سفر کیا تھا، کسی تفریح یا عیاشی کے لیے ہیلی کاپٹر استعمال نہیں کیا۔فیصل کریم کنڈی نے الزام عائد کیا کہ ماضی میں پیسے لے کر تجاوزات کے اجازت نامے جاری کیے جاتے رہے، جبکہ موجودہ حکومت تجاوزات کے خاتمے کے لیے اقدامات کر رہی ہے۔انہوں نے کہا کہ تجاوزات کے خلاف کارروائی سے متاثر ہونے والے افراد کی مشکلات کے ازالے کے لیے طریقہ کار تیار کیا جا رہا ہے۔ ریڑھی بانوں کو بھی مناسب جگہ فراہم کرنے کے لیے اقدامات کیے جائیں گے۔گورنر نے مزید کہا کہ پولیو ورکرز کے ساتھ پیش آنے والے واقعات کی روک تھام اور صوبے میں پولیو کے پھیلاؤ میں کمی لانے کے لیے بھی کوششیں جاری ہیں۔