حافظ نعیم الرحمٰن سے محسن نقوی کی ملاقات،ایران امریکہ کے درمیان مفاہمت پر پاکستانی قردار کو سراہا گیا

لاہور(پاکستان خبر) امیرِ جماعتِ اسلامی پاکستان حافظ نعیم الرحمٰن نے کہا ہے کہ ایران اور امریکا کے درمیان مفاہمت میں پاکستان کے تاریخی اور مثبت کردار کو ہمیشہ یاد رکھا جائے گا۔یہ بات انہوں نے وفاقی وزیرِ داخلہ محسن نقوی سے جماعتِ اسلامی کے مرکز منصورہ میں ملاقات کے دوران کہی۔ملاقات میں ملک کی مجموعی سیاسی، معاشی اور امن و امان کی صورتحال پر تبادلہ خیال کیا گیا، جبکہ ایران اور امریکا کے درمیان مفاہمت کے بعد خطے کی صورتحال پر بھی گفتگو ہوئی۔اس موقع پر وفاقی وزیرِ داخلہ محسن نقوی نے کہا کہ وزیرِاعظم شہباز شریف اور فیلڈ مارشل عاصم منیر نے خطے میں امن کے لیے اہم اور قابلِ ذکر کردار ادا کیا ہے، اور کشیدگی کے خاتمے کا کریڈٹ پاکستان کو جاتا ہے۔دونوں رہنماؤں نے ایران امریکا مفاہمت کو خطے کے استحکام اور امن کے لیے خوش آئند قرار دیتے ہوئے کہا کہ اس پیش رفت سے پائیدار امن کی راہ ہموار ہو گی۔ملاقات میں ملکی معیشت کی بہتری اور عوام کو ریلیف فراہم کرنے کے اقدامات پر بھی تفصیلی بات چیت کی گئی۔