دنیا بھر میں میٹا سروسز متاثر، فیس بک اور انسٹاگرام صارفین کو مشکلات کا سامنا

کیلیفورنیا( ویب ڈیسک) کیلیفورنیا میں قائم سوشل میڈیا کمپنی میٹا کے پلیٹ فارمز فیس بک، انسٹاگرام اور میسنجر کی سروسز دنیا بھر میں متاثر ہونے کی شکایات سامنے آئی ہیں۔صارفین کی ڈیجیٹل پلیٹ فارمز کی نگرانی کرنے والی ویب سائٹ ڈاؤن ڈیٹیکٹر کے مطابق پاکستانی وقت کے مطابق شام تقریباً 6 بج کر 40 منٹ کے قریب دنیا کے مختلف حصوں سے ہزاروں صارفین نے سروسز میں خرابی کی شکایات درج کیں۔صارفین نے بتایا کہ ان کے اکاؤنٹس اچانک لاگ آؤٹ ہو گئے جبکہ کئی افراد کو ایپس کھولنے اور اپنے اکاؤنٹس تک رسائی میں شدید مشکلات کا سامنا کرنا پڑا۔متعدد صارفین نے شکایت کی کہ فیس بک اور انسٹاگرام مکمل طور پر لوڈ نہیں ہو رہے یا بار بار کریش ہو رہے ہیں، جس کے باعث عام صارفین کے ساتھ ساتھ کاروباری سرگرمیاں بھی متاثر ہوئی ہیں۔