مشرق وسطیٰ بحران بڑا معاشی جھٹکا ہے وزیر خزانہ کا عالمی اجلاس میں اظہار خیال

واشنگٹن( کامرس ڈیسک) وفاقی وزیر خزانہ سینیٹر محمد اورنگزیب نے کہا ہے کہ مشرق وسطیٰ میں جاری بحران حالیہ تاریخ کے بڑے معاشی جھٹکوں میں شمار ہوتا ہے، جس کے اثرات عالمی سطح پر محسوس کیے جا رہے ہیں۔انہوں نے عالمی مالیاتی ادارے اور عالمی بینک کے بہاری اجلاس دو ہزار چھبیس کے موقع پر منعقدہ مشرق وسطیٰ، شمالی افریقہ، افغانستان اور پاکستان خطے کے اجلاس میں شرکت کی، جہاں وزرائے خزانہ، مرکزی بینک کے سربراہان اور علاقائی مالیاتی اداروں کے نمائندگان موجود تھے۔اجلاس سے خطاب کرتے ہوئے وزیر خزانہ نے کہا کہ حکومت نے اس صورتحال کے ابتدائی اثرات سے نمٹنے کے لیے درآمدی حکمت عملی، قیمتوں کے نظام اور ترسیل کے نظام میں ضروری تبدیلیاں کی ہیں۔انہوں نے اس عزم کا اعادہ کیا کہ وسیع پیمانے پر سبسڈی دینے کے بجائے ہدفی معاونت کو فروغ دیا جا رہا ہے تاکہ معاشرے کے کمزور طبقات کو مؤثر تحفظ فراہم کیا جا سکے۔وزیر خزانہ نے عالمی معاشی دباؤ کا مقابلہ کرنے کے لیے حکومتی اقدامات پر بھی روشنی ڈالی اور کہا کہ معیشت کو مستحکم رکھنے کے لیے مربوط حکمت عملی اپنائی جا رہی ہے۔