کینج ( مانیٹرنگ ڈیسک) جمہوریہ کانگو میں فوجی طیارہ حادثے کا شکار ہوگیا، جس کے نتیجے میں 2 اعلیٰ فوجی افسران سمیت 14 افراد ہلاک ہوگئے۔کانگو کی فوج کے مطابق طیارہ کِک وِٹ سے دارالحکومت کنشاسا جا رہا تھا کہ راستے میں فنی خرابی پیدا ہوگئی۔پائلٹ نے کینج میں ہنگامی لینڈنگ کی کوشش کی، تاہم مناسب رن وے دستیاب نہ ہونے کے باعث طیارہ رہائشی علاقے میں جا گرا اور تباہ ہوگیا۔فوج کے مطابق ہلاک ہونے والوں میں فوجی عدالت کے سربراہ اور مسلح افواج کے آڈیٹر جنرل سمیت دیگر فوجی اہلکار، وفد کے ارکان اور طیارے کا عملہ شامل ہے۔حادثے کے بعد بیشتر لاشیں بری طرح جھلس گئیں، جس کے باعث شناخت میں مشکلات پیش آئیں۔حکام نے حادثے کی تحقیقات شروع کردی ہیں، تاہم طیارہ گرنے کی حتمی وجہ تاحال سامنے نہیں آسکی۔ مقامی رپورٹس میں اس سے قبل ہلاکتوں کی تعداد 13 یا اس سے زائد بتائی گئی تھی، تاہم فوج نے تازہ بیان میں 14 ہلاکتوں کی تصدیق کی ہے۔
