اسلام آباد( ویب ڈیسک) سائبر سیکیورٹی کو مضبوط بنانے، معلوماتی اثاثوں کے تحفظ اور سائبر خطرات کی بروقت نشاندہی کے لیے جدید سیکیورٹی آپریشنز سینٹر قائم کردیا گیا ہے۔چیئرمین نادرا لیفٹیننٹ جنرل محمد منیر افسر نے سیکیورٹی آپریشنز سینٹر کا افتتاح کیا۔ افتتاحی تقریب میں چیئرمین ایس ای سی پی ڈاکٹر کبیر احمد سدھو اور کمشنرز نے بھی شرکت کی۔حکام کے مطابق سیکیورٹی آپریشنز سینٹر بین الاقوامی معیار اور بہترین عالمی طریقہ کار کے مطابق کام کرے گا، جس سے سائبر خطرات کی نگرانی اور ان سے نمٹنے کی صلاحیت بہتر بنانے میں مدد ملے گی۔اس موقع پر چیئرمین ایس ای سی پی ڈاکٹر کبیر احمد سدھو نے چیئرمین نادرا کو آئی ٹی اصلاحات اور مصنوعی ذہانت کے استعمال سے متعلق بریفنگ دی۔ انہوں نے بتایا کہ خدمات کی فراہمی میں بہتری اور کاروباری سرگرمیوں کو آسان بنانے کے لیے جدید ٹیکنالوجیز کا استعمال بڑھایا جا رہا ہے۔حکام کے مطابق کیپٹل مارکیٹ کے تمام اداروں کو سائبر خطرات سے نمٹنے کے لیے ایک مشترکہ فریم ورک میں شامل کیا جائے گا، تاکہ سائبر سیکیورٹی کے اقدامات کو مربوط اور مؤثر بنایا جاسکے۔
