اسلام آباد( پاکستان خبر)اسلام آباد میں وفاقی وزیر داخلہ محسن نقوی سے چین اور ترکیہ سے جدید تربیتی کورس مکمل کر کے واپس آنے والے اسسٹنٹ سپرنٹنڈنٹ پولیس (اے ایس پیز) نے ملاقات کی۔ملاقات کے دوران اے ایس پیز نے غیر ملکی تربیت کے دوران جدید پولیسنگ، نگرانی کے نظام، ٹیکنالوجی کے استعمال اور امن و امان کے انتظام سے متعلق تجربات سے آگاہ کیا۔وزیر داخلہ نے کہا کہ غیر ملکی تربیتی پروگرامز کو پولیس افسران کی پیشہ ورانہ صلاحیتوں میں اضافے کے لیے مستقل بنیادوں پر جاری رکھا جائے گا۔ انہوں نے اسلام آباد میں چین کے طرز پر لا انفورسمنٹ انویسٹی گیشن سنٹر کے قیام کے لیے پائلٹ منصوبہ شروع کرنے کا اعلان بھی کیا۔محسن نقوی کے مطابق اس مرکز میں حراست، تحقیقات اور سمری ٹرائل کے مراحل ایک ہی جگہ انجام دیے جائیں گے، جبکہ معمولی نوعیت کے جرائم کے مقدمات کے فوری حل کو ممکن بنایا جائے گا۔انہوں نے کہا کہ جدید ٹیکنالوجی اور سرویلنس سسٹمز کے ذریعے پولیسنگ کو مزید مؤثر بنایا جائے گا، جرائم کی روک تھام کے لیے وزارت داخلہ کے ایوی ایشن ونگ میں جدید ڈرونز شامل کیے جائیں گے اور نیشنل پولیس اکیڈمی میں خصوصی تحقیقاتی تربیتی سہولیات قائم کی جائیں گی۔وزیر داخلہ نے مزید کہا کہ جدید تقاضوں کے مطابق تفتیشی تربیت، انٹیروگیشن تکنیکس اور ترقی یافتہ ممالک کے پولیس ماڈلز کو تربیتی نظام کا حصہ بنایا جائے گا۔ ملاقات میں نیشنل پولیس اکیڈمی کے کمانڈنٹ، ڈی جی ایف آئی اے اور دیگر افسران بھی موجود تھے۔
