محسن نقوی کا سعودی عرب میں جدید کرکٹ اسٹیڈیم کا دورہ، تعاون بڑھانے پر اتفاق

لاہور ( سپورٹس ڈیسک) چیئرمین پاکستان کرکٹ بورڈ (پی سی بی) محسن نقوی نے چیئرمین سعودی عرب کرکٹ فیڈریشن شہزادہ سعود بن مشعل آل سعود کے ہمراہ کنگ فہد عبدالعزیز یونیورسٹی میں قائم جدید کرکٹ اسٹیڈیم کا دورہ کیا۔دورے کے دوران محسن نقوی نے اسٹیڈیم کے مختلف حصوں، انکلوژرز اور جاری ترقیاتی منصوبوں کا تفصیلی جائزہ لیا۔ انہیں اسٹیڈیم کی تعمیر، دستیاب سہولیات اور مستقبل کے مجوزہ توسیعی منصوبوں پر بریفنگ بھی دی گئی۔اس موقع پر دونوں رہنماؤں نے کرکٹ انفراسٹرکچر کی بہتری اور مجوزہ تبدیلیوں پر تبادلۂ خیال کیا۔محسن نقوی نے کہا کہ یہ اسٹیڈیم سعودی عرب میں کرکٹ کے فروغ میں اہم کردار ادا کرے گا اور اس کی تکمیل کے بعد ملک میں بین الاقوامی کرکٹ ایونٹس کے انعقاد کی راہ ہموار ہوگی۔انہوں نے شہزادہ سعود بن مشعل آل سعود کے تعاون کو سراہتے ہوئے کہا کہ پاکستان اور سعودی عرب کے درمیان کرکٹ کے فروغ کے لیے تعاون مستقبل میں مزید مضبوط ہوگا۔