لاہور( شوبز ڈیسک) پاکستانی اداکارہ مومنہ اقبال نے سوشل میڈیا پر ایک پُراسرار بیان جاری کرتے ہوئے عندیہ دیا ہے کہ اگر حالات نے مجبور کیا تو وہ حالیہ واقعات کی مکمل حقیقت اور شواہد عوام کے سامنے لے آئیں گی۔اداکارہ نے اپنی بہن رمشا اقبال کا بیان شیئر کرتے ہوئے کہا کہ گزشتہ چند برسوں میں وہ اور ان کا خاندان متعدد مشکلات اور آزمائشوں سے گزر چکے ہیں۔مومنہ اقبال کے مطابق انہوں نے کئی مبینہ ناانصافیوں کے باوجود اس لیے خاموشی اختیار کیے رکھی تاکہ ان کی ذاتی زندگی عوامی بحث یا تماشہ نہ بنے۔انہوں نے اپنے والد کے دو سال قبل انتقال کا ذکر کرتے ہوئے کہا کہ ان کے بعد سے خاندان مسلسل مشکلات اور آزمائشی حالات کا سامنا کر رہا ہے۔اپنے بیان میں اداکارہ نے بعض نامعلوم افراد کو مخاطب کرتے ہوئے سوال اٹھایا کہ آخر وہ اپنے اثر و رسوخ کے ذریعے کتنے لوگوں کو متاثر کر سکتے ہیں۔
