اسرائیلی وزیرِاعظم بنیامین نیتن یاہو کو امریکی پالیسی کے مطابق چلنا ہوگا: ٹرمپ

واشنگٹن( مانیٹرنگ ڈیسک)امریکی صدر ڈونلڈ ٹرمپ نے کہا ہے کہ ایران کے ساتھ ممکنہ معاہدے کے حوالے سے حتمی فیصلے واشنگٹن کرے گا اور اسرائیلی وزیرِاعظم بنیامین نیتن یاہو کو امریکی پالیسی کے مطابق چلنا ہوگا۔برطانوی اخبار فنانشل ٹائمز کو دیے گئے انٹرویو میں ٹرمپ نے کہا کہ ایران اور اسرائیل کے درمیان جاری کشیدگی کے باوجود تہران کے ساتھ مذاکرات کا عمل متاثر نہیں ہوگا۔ان کے مطابق ایران کی جانب سے اسرائیل پر میزائل حملوں کے باوجود ان کے مؤقف میں کوئی تبدیلی نہیں آئی اور وہ اب بھی ایران کے ساتھ کسی ممکنہ معاہدے کے خواہاں ہیں۔امریکی میڈیا رپورٹس کے مطابق صدر ٹرمپ نے نیتن یاہو کو ایران کے خلاف فوری جوابی کارروائی سے گریز کرنے اور سفارتی راستے کو موقع دینے کا مشورہ دیا ہے۔رپورٹس میں یہ بھی کہا گیا ہے کہ واشنگٹن کو ایران کے ساتھ جاری مذاکرات میں پیش رفت کی امید ہے۔صدر ٹرمپ نے خبردار کیا کہ اگر ایران کے ساتھ معاہدہ نہ ہو سکا تو امریکا سخت اقدامات پر غور کر سکتا ہے، جن میں اقتصادی دباؤ برقرار رکھنا یا فوجی آپشنز بھی شامل ہو سکتے ہیں۔خطے میں موجودہ کشیدگی کے تناظر میں امریکا کی جانب سے سفارتی حل پر زور دیا جا رہا ہے، جبکہ صورتحال کو عالمی سطح پر انتہائی حساس قرار دیا جا رہا ہے۔