اسلام آباد (پاکستان خبر) وفاقی وزیر اطلاعات عطا تارڑ نے کہا ہے کہ نئے صوبوں کے قیام سے متعلق حکومت کا مؤقف واضح ہے، اس معاملے پر عوام کی رائے معلوم کی جائے اور اگر شہری نئے صوبوں کی تشکیل چاہتے ہیں تو انہیں قائم کیا جانا چاہیے۔الیکشن کمیشن کے باہر ذرائع ابلاغ کے نمائندوں سے گفتگو کرتے ہوئے عطا تارڑ نے بتایا کہ گوجرانوالہ ان کا آبائی شہر ہے اور انہوں نے ڈسٹرکٹ بار کے جنرل سیکریٹری کی دعوت پر وہاں کا دورہ کیا تھا، اس وقت وہاں کوئی امیدوار موجود نہیں تھا۔انہوں نے وضاحت کی کہ ڈسٹرکٹ بار کے جنرل سیکریٹری کی جانب سے دورے کی دعوت انتخابی شیڈول جاری ہونے سے پہلے موصول ہوئی تھی۔ اس معاملے پر حکومت نے الیکشن کمیشن سے غیر مشروط معذرت بھی کرلی ہے۔نئے صوبوں کے قیام سے متعلق وفاقی وزیر نے کہا کہ اس معاملے پر عوامی رائے حاصل کی جانی چاہیے۔ اگر عوام کی اکثریت نئے صوبوں کے حق میں فیصلہ دیتی ہے تو انہیں تشکیل دیا جائے اور اگر رائے اس کے برعکس ہو تو نئے صوبے نہ بنائے جائیں۔ ان کا کہنا تھا کہ عوامی رائے کے مطابق فیصلے کرنے کا راستہ اختیار کیا جانا چاہیے، اس مقصد کے لیے ریفرنڈم کرانے میں کوئی حرج نہیں۔عطا تارڑ نے مزید بتایا کہ گزشتہ روز صدر مملکت آصف علی زرداری اور وزیراعظم شہباز شریف کے درمیان ملاقات میں مختلف معاملات پر تبادلہ خیال کیا گیا اور باہمی افہام و تفہیم کے ذریعے آگے بڑھنے پر بات ہوئی۔انہوں نے کہا کہ ریفرنڈم سے متعلق آئین میں واضح شق موجود ہے، جس کے تحت قومی اہمیت کے حامل بڑے معاملات پر عوام کی رائے حاصل کی جاسکتی ہے۔ ان کے مطابق عوامی رائے سامنے آنے کے بعد ہی آئندہ کے لائحہ عمل کا تعین کیا جائے گا۔