کراچی( شوبز ڈیسک)پاکستانی میزبان ندا یاسر نے شادی شدہ افراد کو والدین کی جانب سے مسلسل مالی مدد فراہم کرنے کے رجحان پر تنقید کرتے ہوئے کہا ہے کہ بچوں کو خود اپنے قدموں پر کھڑا ہونا چاہیے۔ایک وائرل کلپ میں ندا یاسر نے کہا کہ والدین کو چاہیے کہ وہ اپنے بچوں کو خودمختار بنائیں اور ان کی شادی اس وقت کریں جب وہ اپنی ذمہ داریاں اٹھانے کے قابل ہو جائیں۔انہوں نے کہا کہ بعض ممالک میں نوجوان کم عمری سے کام شروع کر دیتے ہیں اور بالغ ہونے کے بعد اپنی تعلیم، رہائش اور دیگر اخراجات خود برداشت کرتے ہیں، جبکہ پاکستان میں اکثر والدین طویل عرصے تک بچوں کے مالی معاملات سنبھالتے رہتے ہیں۔ندا یاسر کا کہنا تھا کہ ہمارے معاشرے میں بعض اوقات کم عمر بچے گھر کی ذمہ داریاں اٹھا لیتے ہیں، جبکہ دوسری جانب بڑی عمر کے افراد بھی والدین کے مالی سہارے پر انحصار کرتے رہتے ہیں۔انہوں نے کہا کہ بچوں کو صرف تعلیم دلانا اور اخراجات پورے کرنا کافی نہیں بلکہ انہیں زندگی کے فیصلے خود کرنے اور اپنے مستقبل کو بہتر بنانے کے لیے تیار کرنا بھی والدین کی ذمہ داری ہے۔ ان کے مطابق معاشرے میں خود انحصاری کے رجحان کو فروغ دینے کی ضرورت ہے۔
