پاکستان اور بلوچستان کا حال، مستقبل ایک ہے، مذموم عزائم ناکام بنائیں گے: عاصم منیر

راولپنڈی( پاکستان خبر) چیف آف ڈیفنس فورسز فیلڈ مارشل سید عاصم منیر نے کہا ہے کہ پاکستان اور بلوچستان کا حال اور مستقبل ایک ہے اور ہمیشہ ایک رہے گا، ریاست کے غیرمتزلزل اور فیصلہ کن ردعمل سے دشمن کے مذموم عزائم ناکام بنائے جائیں گے۔آئی ایس پی آر کے مطابق فیلڈ مارشل عاصم منیر نے بلوچستان کی اہم شخصیات اور سیاسی قیادت سے ملاقات کی۔ انہوں نے کہا کہ بلوچستان باصلاحیت، محب وطن اور باوقار عوام کی سرزمین ہے، جبکہ پائیدار امن و استحکام صوبے کی معاشی صلاحیت اجاگر کرنے کیلئے ناگزیر ہے۔انہوں نے کہا کہ امن سے سرمایہ کاری بڑھے گی اور بلوچستان کے وسائل کو عوامی خوشحالی میں تبدیل کرنے میں مدد ملے گی۔ صوبے کے نوجوان باصلاحیت اور ملک کا متحرک طبقہ ہیں، انہیں بااختیار بنانا اور قومی ترقی میں کردار کے مواقع دینا ضروری ہے۔فیلڈ مارشل عاصم منیر نے کہا کہ دشمن عناصر بلوچستان میں بدامنی پھیلا کر ترقی کی راہ روکنے اور ریاست و عوام کے درمیان خلیج پیدا کرنے کی کوشش کر رہے ہیں۔