اسلام آباد (سپورٹس ڈیسک) پاکستان انڈر 21 ہاکی ٹیم عمان کی سینئر قومی ٹیم کے خلاف ٹیسٹ سیریز کھیلنے کے لیے مسقط روانہ ہو گئی۔قومی ٹیم کے ہمراہ ہیڈ کوچ اولمپیئن ایاز محمود، کوچ اولمپیئن سمیر حسین اور کوچ اظفر یعقوب بھی موجود ہیں۔شیڈول کے مطابق پاکستان انڈر 21 ہاکی ٹیم عمان کے خلاف پہلا ٹیسٹ میچ 29 جولائی کو کھیلے گی، جبکہ دوسرا میچ 31 جولائی، تیسرا یکم اگست، چوتھا 2 اگست اور پانچواں و آخری ٹیسٹ میچ 4 اگست کو ہوگا۔پاکستان ہاکی فیڈریشن کے صدر محی الدین احمد وانی نے قومی ٹیم کے لیے نیک خواہشات کا اظہار کرتے ہوئے کہا کہ انڈر 21 کیمپ کے کھلاڑیوں کو عمان ٹیسٹ سیریز کے لیے بھیجنے کا مقصد ان کی حوصلہ افزائی اور بین الاقوامی تجربہ فراہم کرنا ہے۔انہوں نے کہا کہ نوجوان کھلاڑی جب عالمی سطح پر غیر ملکی ٹیموں کے خلاف کھیلیں گے تو ان کا اعتماد اور حوصلہ مزید بلند ہوگا، جو مستقبل میں پاکستان ہاکی کے لیے فائدہ مند ثابت ہوگا۔
