کراچی (شوبز ڈیسک) پاکستان کے معروف یوٹیوبر اور ڈیجیٹل کانٹینٹ کریئٹر امتنان احمد نے صحت کے مسائل کے باعث سوشل میڈیا سے کنارہ کشی اختیار کرنے کا اعلان کردیا، جس پر ان کے مداح حیران اور تشویش میں مبتلا ہیں۔امتنان احمد یوٹیوب پر معلوماتی اور تحقیقی ویڈیوز بنانے کے حوالے سے شہرت رکھتے ہیں۔ وہ اپنی ویڈیوز میں جنگوں، عالمی حالات، سائنس اور مختلف سماجی موضوعات پر گفتگو کرتے رہے ہیں۔ان کے منفرد انداز اور معلوماتی مواد کو پسند کرنے والے ناظرین کی ایک بڑی تعداد موجود ہے، جو ان کی ویڈیوز میں گہری دلچسپی رکھتی ہے۔رپورٹس کے مطابق امتنان احمد کو صحت سے متعلق مشکلات کا سامنا ہے، جس کے باعث ان کے لیے مزید ویڈیوز بنانا اور پہلے کی طرح سوشل میڈیا پر سرگرم رہنا ممکن نہیں رہا۔ اسی وجہ سے انہوں نے سوشل میڈیا چھوڑنے کا فیصلہ کیا ہے۔ان کے اس اعلان کے بعد مداحوں میں تشویش پائی جارہی ہے۔ تاہم دستیاب معلومات میں ان کی صحت سے متعلق مسائل کی مزید تفصیلات سامنے نہیں آئیں۔
