لاہور( سپورٹس ڈیسک) پاکستان کرکٹ بورڈ (پی سی بی) نے ڈومیسٹک کرکٹ سیزن 2026-27 کا شیڈول جاری کر دیا ہے، جس کا آغاز 11 اگست کو ملتان سے ہوگا۔پی سی بی کے مطابق 2027 کے ورلڈ کپ کی تیاریوں کو مدنظر رکھتے ہوئے سیزن کا آغاز چیمپئنز کپ لسٹ اے ون ڈے ٹورنامنٹ سے کیا جائے گا، جبکہ اس کے علاوہ ڈیپارٹمنٹل ون ڈے کپ بھی شیڈول کا حصہ ہوگا۔نئے سیزن میں 16 ریجنز کی 18 ٹیموں کی تعداد بڑھا کر 20 کر دی گئی ہے۔ سیالکوٹ اور پشاور ریجنز کو بھی لاہور اور کراچی کی طرز پر دو، دو ریجنل ٹیمیں دی گئی ہیں۔ریڈ بال کرکٹ سیزن میں قائداعظم ٹرافی گولڈ اور سلور کے ساتھ پریذیڈنٹ ٹرافی گریڈ ون، گریڈ ٹو گولڈ اور گریڈ ٹو سلور شامل ہوں گے۔پریذیڈنٹ ٹرافی کے تینوں ٹورنامنٹس کا آغاز 12 ستمبر سے ہوگا، جبکہ قائداعظم ٹرافی گولڈ اور سلور مقابلے یکم نومبر سے شروع کیے جائیں گے۔قائداعظم ٹرافی گولڈ میں 8 ٹیمیں جبکہ سلور میں 12 ٹیمیں حصہ لیں گی۔ دونوں ڈویژنز کو فرسٹ کلاس حیثیت حاصل ہوگی اور ان میں ترقی و تنزلی کا نظام برقرار رکھا جائے گا۔پی سی بی کے مطابق نیشنل ٹی ٹوئنٹی کپ گولڈ اور سلور کے دونوں ٹورنامنٹس 5 فروری سے 6 مارچ تک لاہور میں منعقد ہوں گے۔ڈومیسٹک سیزن میں جونیئر کھلاڑیوں کے لیے بھی مختلف مقابلے شامل کیے گئے ہیں، جن میں انڈر 19 تین روزہ ٹورنامنٹ، نیشنل انڈر 19 کپ، نیشنل انڈر 19 چیمپئن شپ، نیشنل انڈر 15 ون ڈے کپ اور انڈر 17 ٹورنامنٹ شامل ہیں۔
