آئندہ بجٹ میں تنخواہ دار طبقے کو ٹیکس ریلیف دینے کی تیاری، نئی تجاویز زیر غور

اسلام آباد ( کامرس ڈیسک) آئندہ مالی سال کے بجٹ کے حوالے سے تنخواہ دار طبقے کو ٹیکس ریلیف دینے کے لیے اہم تجاویز پر کام مکمل کر لیا گیا ہے۔ذرائع کے مطابق ماہانہ ایک لاکھ، دو لاکھ اور تین لاکھ روپے تک تنخواہ لینے والوں کے لیے انکم ٹیکس میں کمی کی تجاویز تیار کی گئی ہیں، جبکہ اعلیٰ آمدن والے طبقے پر عائد سرچارج میں کمی یا خاتمے پر بھی غور کیا جا رہا ہے۔مجوزہ پلان کے تحت انکم ٹیکس سلیبز کی تعداد چھ سے بڑھا کر آٹھ کرنے کی تجویز دی گئی ہے تاکہ مختلف آمدنی کے گروپس کو زیادہ بہتر انداز میں ریلیف فراہم کیا جا سکے۔ذرائع کا کہنا ہے کہ مختلف آمدنی کی سطحوں پر ٹیکس کی شرح میں 3، 5 اور 10 فیصد تک کمی کی تجاویز زیر غور ہیں، جن پر متعلقہ اداروں اور عالمی مالیاتی ادارے کے درمیان مشاورت جاری ہے۔اس کے علاوہ زیادہ آمدنی والے افراد کے لیے موجودہ ٹیکس نظام میں تبدیلی اور کچھ نئی سلیبز متعارف کرانے کی بھی تیاری کی جا رہی ہے۔حکومتی ذرائع کے مطابق اس تمام عمل کا مقصد تنخواہ دار طبقے پر مالی دباؤ کم کرنا اور ٹیکس نظام کو زیادہ متوازن بنانا ہے، جبکہ حتمی فیصلے بجٹ کی منظوری کے بعد کیے جائیں گے۔