صدر ٹرمپ نے ایران کو سخت نقصان پہنچا کر ایک نئی مثال قائم کی:امریکی وزیر دفاع

واشنگٹن ( مانیٹرنگ ڈیسک) امریکی وزیر دفاع پیٹ ہیگستھ نے پریس کانفرنس کے دوران صدر ڈونلڈ ٹرمپ کی قیادت کو سراہتے ہوئے ایران کے خلاف کارروائی کو بڑی کامیابی قرار دیا ہے۔انہوں نے کہا کہ صدر ٹرمپ نے ایران کو سخت نقصان پہنچا کر ایک نئی مثال قائم کی اور ایسی کامیابی حاصل کی جو اس سے پہلے ممکن نہیں ہو سکی تھی۔پیٹ ہیگستھ کے مطابق ایران کی فضائیہ اور بحریہ کو شدید نقصان پہنچایا گیا جبکہ اس کی جوہری صلاحیت کو بھی متاثر کیا گیا ہے۔ انہوں نے دعویٰ کیا کہ ایران جنگ بندی پر آمادہ ہونے کے لیے خود پیش ہوا۔وزیر دفاع نے کہا کہ ایران میں اب ایسے عناصر سامنے آ رہے ہیں جو مذاکرات کے حامی ہیں اور امریکا کی بنیادی شرط یہی ہے کہ ایران کے پاس جوہری ہتھیار نہ ہوں۔انہوں نے جنگ بندی کو ایک مثبت موقع قرار دیتے ہوئے کہا کہ یہ حقیقی امن اور ممکنہ معاہدے کی راہ ہموار کر سکتی ہے۔پیٹ ہیگستھ کا کہنا تھا کہ امریکی وزارت دفاع اپنا کردار ادا کر چکی ہے تاہم صورتحال پر مکمل نظر رکھی جا رہی ہے اور کسی بھی تبدیلی کی صورت میں فوری ردعمل کی صلاحیت موجود ہے۔انہوں نے واضح کیا کہ جنگ وقتی طور پر دو ہفتوں کے لیے معطل کی گئی ہے لیکن امریکی افواج ہر قسم کی صورتحال سے نمٹنے کے لیے تیار ہیں۔بعد ازاں چیئرمین جوائنٹ چیفس آف اسٹاف جنرل ڈین کین نے بھی پینٹاگون میں پریس کانفرنس سے خطاب کیا اور عسکری معاملات پر بریفنگ دی۔