صوبے وفاق کو این ایف سی کا اضافی شیئر دینے پر آمادہ، اہم مالی پیش رفت

اسلام آباد ( کامرس ڈیسک) مالی امور سے متعلق اہم پیش رفت سامنے آئی ہے، جس کے تحت صوبے وفاق کو قومی مالیاتی کمیشن (این ایف سی) کے تحت اضافی مالی شیئر دینے پر آمادہ ہو گئے ہیں۔وزارت خزانہ کے ذرائع کے مطابق پنجاب اور سندھ آئندہ مالی سال کے دوران وفاق کو ٹیکس ہدف میں اضافے کے مطابق اضافی رقم فراہم کریں گے، تاہم این ایف سی کے بنیادی تقسیم فارمولے میں کوئی تبدیلی نہیں کی جائے گی۔ذرائع کا کہنا ہے کہ یہ اضافی رقوم سٹریٹیجک اخراجات کے لیے استعمال کی جائیں گی، جبکہ وفاق آئندہ برسوں میں یہ گرانٹس صوبوں کو واپس کرنے کا ارادہ رکھتا ہے۔معلومات کے مطابق آئندہ مالی سال کے لیے ٹیکس ہدف میں نمایاں اضافہ متوقع ہے، جس کے تحت پنجاب اور سندھ سے بڑی مالی معاونت حاصل ہونے کا امکان ہے۔ذرائع نے بتایا کہ اس حوالے سے مذاکرات نائب وزیراعظم اور وزیر خارجہ کی زیر صدارت تکنیکی کمیٹی اور متعلقہ سیاسی جماعتوں کے درمیان کامیابی سے مکمل ہوئے، جس کے بعد یہ مالی فریم ورک طے پایا ہے۔حکام کے مطابق اس پیش رفت کا مقصد وفاق اور صوبوں کے درمیان مالی تعاون کو بہتر بنانا اور قومی مالی نظم و نسق کو مضبوط کرنا ہے۔