پنجاب میں میٹرو اور اورنج لائن سمیت مفت سفری سہولت ختم کرنے کا فیصلہ

لاہور(پاکستان خبر)پنجاب حکومت نے میٹرو بس، اورنج لائن ٹرین، سپیڈو، الیکٹرک بس اور گرین بس سروسز پر فراہم کی جانے والی مفت سفری سہولت ختم کرنے کا فیصلہ کر لیا ہے۔پنجاب ماس ٹرانزٹ اتھارٹی کے مطابق پٹرولیم مصنوعات کی قیمتوں میں خاطر خواہ کمی نہ ہونے کے باعث سبسڈی ختم کی گئی ہے، جس کے بعد 13 جون سے تمام ماس ٹرانزٹ سروسز میں مسافروں کو معمول کے مطابق کرایہ ادا کرنا ہوگا۔ آج رات تک شہریوں کو مفت سفر کی سہولت حاصل رہے گی۔حکام کے مطابق یہ مفت سفری سہولت اپریل 2026 میں عوامی ریلیف پیکج کے تحت متعارف کرائی گئی تھی، جو ابتدائی طور پر ایک ماہ کے لیے تھی، تاہم بعد میں اس میں توسیع پر بھی غور کیا گیا۔اعداد و شمار کے مطابق ان ٹرانسپورٹ سروسز سے روزانہ تقریباً آٹھ لاکھ مسافر مفت سفر کر رہے تھے، جن میں صرف اورنج لائن ٹرین کے ذریعے دو لاکھ نوے ہزار جبکہ میٹرو بس سروس سے ایک لاکھ سے زائد شہری مستفید ہو رہے تھے۔حکومت کے مطابق یہ سہولت مہنگائی اور ایندھن کی قیمتوں میں اضافے کے اثرات کم کرنے کے لیے دی گئی تھی، تاہم اب اس کے خاتمے کے بعد مسافروں کو دوبارہ مقررہ کرایہ ادا کرنا ہوگا۔