لارڈز ( سپورٹس ڈیسک)میرلبون کرکٹ کلب (ایم سی سی) نے لارڈز کرکٹ گراؤنڈ کی پچ کی کارکردگی پر مایوسی کا اظہار کرتے ہوئے اسے توقعات کے مطابق قرار نہیں دیا۔ایم سی سی کے چیف ایگزیکٹو راب لاسن کے مطابق کلب نے تسلیم کیا ہے کہ حالیہ ٹیسٹ میچ کی پچ پر گیند کا اچھال غیر متوازن اور غیر مستقل تھا، جو اس سطح کے گراؤنڈ سے وابستہ معیار کے مطابق نہیں تھا۔ان کا کہنا تھا کہ کلب ہمیشہ اعلیٰ معیار برقرار رکھنے کی کوشش کرتا ہے، اس لیے جب وکٹ ان معیارات پر پوری نہ اترے تو مایوسی فطری امر ہے۔واضح رہے کہ لارڈز میں انگلینڈ اور نیوزی لینڈ کے درمیان کھیلے گئے پہلے ٹیسٹ میچ میں صرف ایک سو چھیاسٹھ اوورز میں چالیس وکٹیں گر گئیں، جس میں انگلینڈ نے نیوزی لینڈ کو ایک سو پندرہ رنز سے شکست دی۔ بارش کے باعث میچ چوتھے دن تک محدود رہا۔میچ کے دوران پچ پر گیند کا اچھال غیر متوقع رہا، جس کے باعث بلے بازوں کو مشکلات کا سامنا کرنا پڑا۔ ان میں سے چوبیس وکٹیں بولڈ یا ایل بی ڈبلیو کی صورت میں گریں۔اس سے قبل انگلینڈ کے کپتان بین اسٹوکس نے بھی غیر معمولی کنڈیشنز پر تشویش ظاہر کرتے ہوئے کہا تھا کہ ایسی پچیں ٹیسٹ کرکٹ کے معیار اور مستقبل کے لیے درست نہیں ہیں۔
