ممبئی( شوبز ڈیسک) بالی ووڈ اداکار سلمان خان نے امتحانی پرچوں کے لیک ہونے کے خلاف جاری طلبہ کے احتجاج کی حمایت کرتے ہوئے کہا ہے کہ انہیں افسوس ہے کہ ایک پُرامن تحریک نے تشدد کی شکل اختیار کر لی۔سلمان خان نے سماجی رابطے کی ویب سائٹ ایکس پر اپنے بیان میں کہا کہ ان کی ہمدردیاں ان طلبہ اور ان کے اہل خانہ کے ساتھ ہیں جو احتجاج کے دوران زخمی ہوئے۔انہوں نے کہا کہ پیپر لیک ایک انتہائی سنجیدہ مسئلہ ہے، تاہم یہ دیکھ کر خوشی ہوئی کہ ملک کے طلبہ بہتر تعلیمی نظام کے لیے متحد ہوئے اور ان کے والدین نے بھی ان کا بھرپور ساتھ دیا۔بالی ووڈ اداکار نے طلبہ کے عزم کو سراہتے ہوئے کہا کہ یہ نوجوان محنت کے ذریعے اپنے مستقبل کو بہتر بنانے اور ایک تعلیم یافتہ بھارت کی تشکیل کے لیے کوشش کر رہے ہیں۔سلمان خان کا کہنا تھا کہ طلبہ کا احتجاج پُرامن تھا اور انہوں نے ہمت و ذمہ داری کا مظاہرہ کیا، یہی نوجوان نسل مستقبل میں ملک کا نام روشن کرے گی۔
