ممبئی (شوبز ڈیسک) بالی ووڈ کے معروف اداکار شاہ رخ خان نے متحدہ عرب امارات کے شہر ابوظبی میں موسیقی کے بڑے میلے ’یونیفائیڈ‘ کے انعقاد کا اعلان کردیا ہے، جس میں اریجیت سنگھ، سونو نگم اور کرن اوجلا سمیت 15 سے زائد فنکار اپنی پرفارمنس پیش کریں گے۔بھارتی میڈیا کے مطابق ایک روزہ میوزک فیسٹیول 20 مارچ 2027 کو ابوظبی کے جزیرے یاس پر واقع اتحاد لائیو میں منعقد ہوگا۔فیسٹیول کا مقصد بھارتی موسیقی کی مختلف نسلوں اور انداز کو ایک عالمی پلیٹ فارم پر یکجا کرنا ہے۔ اس موقع پر بھارت، مشرقِ وسطیٰ اور جنوبی ایشیا کے مختلف علاقوں سے موسیقی کے شائقین کی شرکت متوقع ہے۔فیسٹیول میں معروف بھارتی گلوکار اریجیت سنگھ اور سونو نگم ہندی موسیقی پیش کریں گے، جبکہ پنجابی گلوکار اور ریپر کرن اوجلا بھی میلے کا حصہ ہوں گے۔ منتظمین کے مطابق مزید فنکاروں کے ناموں کا اعلان بعد میں کیا جائے گا۔فیسٹیول کے اعلان پر شاہ رخ خان نے کہا کہ موسیقی میں مختلف ثقافتوں اور برادریوں کو یکجا کرنے کی غیر معمولی طاقت موجود ہے۔ ان کا کہنا تھا کہ انہوں نے اپنی زندگی کا بڑا حصہ پردے پر کہانیاں سنانے میں گزارا ہے اور اس دوران دیکھا ہے کہ کہانیاں لوگوں کو کس طرح ایک دوسرے کے قریب لاتی ہیں۔
