ممبئی( شو بز ڈیسک)بالی ووڈ کے سپر اسٹار شاہ رخ خان کی آنے والی فلم کنگ کو ان کے فلمی کیریئر کا اب تک کا سب سے بڑا اور مہنگا منصوبہ قرار دیا جا رہا ہے۔بھارتی میڈیا رپورٹس کے مطابق فلم کنگ کا تخمینی بجٹ تقریباً 450 کروڑ بھارتی روپے ہے، جس میں فلم کی تشہیری مہم کے اخراجات اور شاہ رخ خان کا معاوضہ شامل نہیں کیا گیا۔بجٹ کے اعتبار سے یہ فلم شاہ رخ خان کی کامیاب فلموں جوان اور پٹھان کو بھی پیچھے چھوڑ سکتی ہے، جن کے بجٹ بالترتیب تقریباً 400 کروڑ اور 350 کروڑ بھارتی روپے بتائے جاتے ہیں۔رپورٹس کے مطابق فلم کی شوٹنگ مئی 2025 میں شروع ہوئی تھی اور اب تک دنیا کے مختلف ممالک میں 150 سے زائد دنوں کی فلم بندی مکمل کی جا چکی ہے۔ امکان ہے کہ فلم کی شوٹنگ اگست 2026 میں مکمل کر لی جائے گی۔فلم میں بڑے پیمانے پر ایکشن مناظر شامل کیے جا رہے ہیں، جن کی تیاری بین الاقوامی اسٹنٹ ماہرین کی نگرانی میں کی جا رہی ہے۔ فلم کے خصوصی بصری اثرات کی ذمہ داری بھی شاہ رخ خان کے پروڈکشن ادارے کو دی گئی ہے۔رپورٹس کے مطابق فلم سے منسلک ذرائع کا کہنا ہے کہ کنگ کو ابتدا میں ایک ایکشن تھرلر کے طور پر بنانے کا منصوبہ تھا، تاہم شاہ رخ خان اور ہدایت کار کے وسیع وژن کے باعث اسے ایک بڑے پیمانے کی ایکشن فلم میں تبدیل کر دیا گیا۔ذرائع کے مطابق شاہ رخ خان اپنے مداحوں کو معیاری اور شاندار سنیما تجربہ فراہم کرنے پر یقین رکھتے ہیں۔ فلم میں ایسے بڑے ایکشن مناظر شامل کیے جا رہے ہیں جو ناظرین کے لیے منفرد تجربہ ثابت ہوں گے، جبکہ فلم پر کی جانے والی سرمایہ کاری ہر منظر میں نمایاں دکھائی دے گی۔واضح رہے کہ کنگ کے ذریعے شاہ رخ خان تقریباً تین سال بعد بڑے پردے پر واپسی کریں گے۔
