واشنگٹن( سپورٹس ڈیسک) امریکا کے میجر لیگ کرکٹ ٹورنامنٹ میں سری لنکن فاسٹ بولر داسن شناکا نے شاندار کارکردگی کا مظاہرہ کرتے ہوئے آخری اوور میں 4 گیندوں پر 4 وکٹیں حاصل کر کے اپنی ٹیم سیئٹل اورکاس کو فتح دلا دی۔اتوار کو کھیلے گئے میچ میں داسن شناکا نے ٹیکساس سپر کنگز کے خلاف آخری اوور میں یادگار بولنگ کرتے ہوئے سیئٹل اورکاس کو 9 رنز سے کامیابی دلوائی۔122 رنز کے ہدف کے تعاقب میں ٹیکساس سپر کنگز کی ٹیم آخری اوور سے قبل 107 رنز پر 5 وکٹوں کے نقصان کے ساتھ موجود تھی اور اسے جیت کے لیے آخری 6 گیندوں پر 15 رنز درکار تھے۔ ڈونوون فریرا اور شبھم رنجانے کریز پر موجود تھے۔داسن شناکا نے آخری اوور کا آغاز کیا تو پہلی گیند پر شبھم رنجانے نے باؤنڈری حاصل کی، جس کے بعد ٹیکساس کو 5 گیندوں پر 11 رنز درکار تھے۔ اگلی گیند پر ایک رن بنا، لیکن اس کے بعد میچ کا نقشہ مکمل طور پر بدل گیا۔شناکا نے تیسری گیند پر ڈونوون فریرا کو کلین بولڈ کیا، چوتھی گیند پر کیلون سیویج کو لانگ آن پر کیچ آؤٹ کرایا، جبکہ ہیٹ ٹرک گیند پر ایڈم ملن بڑا شاٹ کھیلنے کی کوشش میں وکٹ کیپر کے ہاتھوں کیچ آؤٹ ہو گئے۔آخری گیند پر بھی شناکا نے شاندار بولنگ کا مظاہرہ کرتے ہوئے امشی ڈی سلوا کو شمرون ہیٹ مائر کے ہاتھوں کیچ آؤٹ کرا دیا اور 4 گیندوں پر 4 مسلسل وکٹیں حاصل کرنے کا منفرد اعزاز حاصل کر لیا۔یہ میجر لیگ کرکٹ کی تاریخ میں پہلا موقع ہے جب کسی بولر نے 4 گیندوں پر مسلسل 4 وکٹیں حاصل کی ہیں۔
