موغادیشو ( سپورٹس ڈیسک) صومالیہ سے تعلق رکھنے والے فٹبال ریفری عمر آرتان کو یورپی فٹبال کی تنظیم نے یوئیفا سپر کپ 2026 کے لیے میچ آفیشل مقرر کر دیا ہے۔ اس تقرری کا باقاعدہ اعلان جمعرات کو کیا گیا۔تینتیس سالہ عمر آرتان کو اس سال امریکا، کینیڈا اور میکسیکو میں ہونے والے عالمی کپ میں ریفری کے فرائض انجام دینے تھے، تاہم انہیں امریکا میں داخلے سے روک دیا گیا اور میامی انٹرنیشنل ایئرپورٹ پر پہنچنے کے بعد واپس بھیج دیا گیا، جس کے بعد وہ عالمی کپ ریفریز پینل سے دستبردار ہو گئے۔بعد ازاں وہ ترکی کے شہر استنبول سے صومالیہ واپس پہنچے، جہاں ان کا شاندار استقبال کیا گیا اور انہیں قومی ہیرو کے طور پر سراہا گیا۔اب یورپی فٹبال تنظیم نے انہیں ایک بڑا موقع دیتے ہوئے سپر کپ میچ کے لیے ذمہ داریاں سونپ دی ہیں، جو چیمپئنز لیگ کی فاتح ٹیم پیرس سینٹ جرمین اور یوروپا لیگ چیمپئن آسٹن ولا کے درمیان کھیلا جائے گا۔ یہ میچ بارہ اگست کو آسٹریا کے شہر سالزبرگ میں منعقد ہوگا۔یورپی فٹبال تنظیم کے مطابق عمر آرتان کو دنیا کے بہترین ریفریز میں شمار کیا جاتا ہے، اور ان کے عالمی کپ میں شامل نہ ہونے کی وجہ امریکا میں داخلے کی اجازت نہ ملنا بتائی گئی ہے۔
