ٹرمپ ایرانی میڈیا پر برہم، ایران امریکا معاہدے کی لیک تفصیلات کو جعلی قرار دے دیا

واشنگٹن( مانیٹرنگ ڈیسک) واشنگٹن میں امریکی صدر ڈونلڈ ٹرمپ نے ایرانی میڈیا میں امن معاہدے کی تفصیلات سامنے آنے پر شدید ردعمل کا اظہار کیا ہے۔انہوں نے کہا کہ یہ معلومات جعلی ہیں اور ایران کی جانب سے میڈیا پر جاری کی جانے والی شرائط کا کسی بھی تحریری معاہدے سے کوئی تعلق نہیں۔واضح رہے کہ صدر ٹرمپ نے ایرانی وزیر خارجہ عباس عراقچی کا ایک بیان بھی سوشل میڈیا پر شیئر کیا تھا جس میں انہوں نے کہا تھا کہ اسلام آباد مفاہمتی یادداشت پر غیر معمولی حد تک اتفاق پایا جا رہا ہے۔دوسری جانب امریکی نائب صدر جے ڈی وینس نے ایران کے منجمد اثاثوں کی بحالی سے متعلق خبروں کو مسترد کرتے ہوئے کہا ہے کہ صرف معاہدے پر دستخط کی صورت میں فنڈز جاری کیے جانے کی بات درست نہیں۔انہوں نے مزید کہا کہ ممکنہ معاہدہ اس طرح ترتیب دیا جائے گا جس میں امریکا اور اس کے اتحادیوں کے تحفظات کو مکمل طور پر مدنظر رکھا جائے گا، جبکہ ایران کی جانب سے شرائط پوری ہونے کی صورت میں ہی مالی معاونت جاری کی جائے گی۔