امریکی ایلچی سٹیو وٹکوف اور ایرانی وزیر خارجہ عباس عراقچی سفارتی مشن کے تحت سوئٹزرلینڈ روانہ

واشنگٹن( مانیٹرنگ ڈیسک)امریکی ایلچی سٹیو وٹکوف اور ایرانی وزیر خارجہ عباس عراقچی ایک اہم سفارتی مشن کے تحت سوئٹزرلینڈ روانہ ہو رہے ہیں، جہاں واشنگٹن اور تہران کے درمیان عبوری امن معاہدے کو مستقل علاقائی امن معاہدے میں تبدیل کرنے پر بات چیت متوقع ہے۔امریکی ویب سائٹ ایکسیوس کے مطابق اس اعلیٰ سطحی اجلاس میں سٹیو وٹکوف کے ساتھ صدر ڈونلڈ ٹرمپ کے داماد جیرڈ کشنر بھی شریک ہوں گے، جبکہ ایرانی وزیر خارجہ کے بھی اجلاس میں شرکت کا امکان ہے۔یہ پیش رفت ایک ایسے وقت میں سامنے آئی ہے جب لبنان میں اسرائیل اور حزب اللہ کے درمیان کشیدگی کے بعد خطے کی صورتحال مزید حساس ہو گئی تھی، اور عالمی سطح پر توانائی و سیکیورٹی خدشات بھی بڑھ گئے تھے۔رپورٹس کے مطابق حالیہ 14 نکاتی عبوری معاہدے کے تحت فریقین کو ایران کے جوہری پروگرام اور دیگر علاقائی تنازعات کے حل کے لیے 60 دن کا وقت دیا گیا ہے۔ایک سینئر امریکی اہلکار کے مطابق اسرائیل اور حزب اللہ کے درمیان جنگ بندی بھی طے پا گئی ہے، جس میں امریکا اور قطر کے مذاکرات کاروں نے اہم کردار ادا کیا ہے، جبکہ فریقین نے اس کی تصدیق بھی کی ہے۔لبنانی وزارت صحت کے مطابق جنگ بندی سے قبل ہونے والے فضائی حملوں میں متعدد افراد جاں بحق ہوئے، جبکہ اسرائیلی حکام نے بھی اپنے فوجیوں کی ہلاکتوں کی تصدیق کی ہے۔