واشنگٹن (مانیٹرنگ ڈیسک) امریکی وزیر داخلہ مارک وین مولن نے ملک بھر میں پروازوں کی اچانک معطلی کے واقعے پر وضاحت دیتے ہوئے کہا ہے کہ یہ نائن الیون جیسے دہشت گرد حملوں کا کوئی نیا واقعہ نہیں بلکہ مواصلاتی نظام میں خرابی کے باعث پیش آیا ہے۔وزیر داخلہ نے وزیر ٹرانسپورٹ شان ڈفی کے ہمراہ پریس کانفرنس کرتے ہوئے بتایا کہ پروازیں روکنے کی اصل وجہ جاننے کے لیے تحقیقات جاری ہیں۔ انہوں نے جمعے کی شام تمام امریکی پروازوں کی اچانک بندش کو غیر معمولی واقعہ قرار دیا، تاہم واضح کیا کہ اس حوالے سے کسی بدنیتی پر مبنی حملے کے شواہد نہیں ملے۔امریکی ذرائع ابلاغ کے مطابق وفاقی ادارہ برائے ہوا بازی نے مواصلاتی نظام میں تعطل کے بعد ملک بھر میں پروازوں کی روانگی روکنے کا حکم دیا تھا۔ اس اقدام کے تحت طیاروں کو اڑان بھرنے سے روک دیا گیا، جبکہ فضائی حدود میں موجود اور بین الاقوامی پروازوں سے متعلق معاملات کو الگ الگ بنیادوں پر نمٹانے کا فیصلہ کیا گیا۔مارک وین مولن نے کہا کہ طیاروں کی واپسی اور پروازوں کی بحالی کے لیے ترجیحات طے کی جائیں گی۔ انہوں نے یقین دہانی کرائی کہ اب تک کسی دہشت گرد حملے یا امریکا کے خلاف تخریبی کارروائی کا کوئی اشارہ نہیں ملا اور معاملہ بظاہر مواصلاتی نظام کی خرابی تک محدود ہے۔انہوں نے بتایا کہ محکمہ داخلی سلامتی کو شہریوں کی جانب سے بڑی تعداد میں فون موصول ہورہے ہیں جن میں پروازوں کی بندش کو دہشت گرد حملہ قرار دیے جانے سے متعلق سوالات کیے جارہے ہیں۔ ان کا کہنا تھا کہ تمام افراد محفوظ ہیں اور مسافروں کے اہل خانہ کو پریشان ہونے کی ضرورت نہیں۔امریکی وزیر داخلہ کے مطابق ملک گیر سطح پر آخری مرتبہ تمام پروازیں نائن الیون کے دہشت گرد حملوں کے دوران معطل کی گئی تھیں۔ تاہم 11 جنوری 2023 کو بھی وفاقی ادارہ برائے ہوا بازی کے نوٹم نامی کمپیوٹر نظام میں تکنیکی خرابی کے باعث اندرون ملک پروازوں کی روانگی تقریباً ڈیڑھ گھنٹے کے لیے روک دی گئی تھی۔
امریکا میں پروازوں کی معطلی نائن الیون جیسا واقعہ نہیں، وزیر داخلہ کی وضاحت
واپس خبروں پر
Category:
عالمی خبریں