ہرارے(سپورٹس ڈیسک) زمبابوے نے بنگلادیش کو پہلے ایک روزہ میچ میں 25 رنز سے شکست دے کر تین میچز کی سیریز میں 0-1 کی برتری حاصل کر لی۔ہرارے میں کھیلے گئے پہلے ون ڈے میچ میں زمبابوے کی جانب سے دیے گئے 142 رنز کے ہدف کے تعاقب میں بنگلادیش کی پوری ٹیم 32ویں اوور میں 116 رنز بنا کر آؤٹ ہو گئی۔بنگلادیش کی جانب سے نورالحسن نے 31 جبکہ توحید ہردوئے نے 25 رنز بنائے۔ کپتان مہدی حسن میراز 10، تنزید حسن 8، سومیا سرکار 6، تسکین احمد 5، مستفیض الرحمان 5، نجم الحسن شانٹو 3، مصدق حسین 3 اور رشاد حسین 3 رنز بنا کر آؤٹ ہوئے، جبکہ ناہید رانا 5 رنز کے ساتھ ناٹ آؤٹ رہے۔زمبابوے کی جانب سے بریڈ ایونز اور رچرڈ نگاروا نے شاندار بولنگ کرتے ہوئے 3، 3 وکٹیں حاصل کیں، جبکہ بلیسنگ مزرابانی اور نیومن نیامہوری نے 2، 2 کھلاڑیوں کو پویلین کی راہ دکھائی۔اس سے قبل بنگلادیش کے دعوت دینے پر پہلے بیٹنگ کرتے ہوئے زمبابوے کی ٹیم 36.4 اوورز میں 141 رنز بنا کر آؤٹ ہو گئی تھی۔زمبابوے کی جانب سے نیومن نیامہوری نے 33 اور کپتان رچرڈ نگاروا نے 27 رنز بنائے، جبکہ انوسینٹ کایا 26، بین کرن 18 اور برائن بینیٹ 17 رنز بنانے میں کامیاب رہے۔دیگر بلے بازوں میں بریڈ ایونز 3، کلائیو میڈانڈے 2، سکندر رضا 1، کریگ اروائن اور ویسلے میدھیویر بغیر کوئی رن بنائے آؤٹ ہوئے، جبکہ بلیسنگ مزرابانی 4 رنز کے ساتھ ناٹ آؤٹ رہے۔بنگلادیش کی جانب سے ناہید رانا نے تباہ کن بولنگ کرتے ہوئے 6 وکٹیں حاصل کیں، جبکہ تسکین احمد نے 2 اور مہدی حسن میراز نے ایک کھلاڑی کو آؤٹ کیا۔
