لاہور ( سپورٹس ڈیسک) جنوبی افریقا کے 20 سالہ بلے باز لوہان ڈرے پریٹوریئس نے مردوں کی ٹی ٹوئنٹی کرکٹ میں سب سے بڑی انفرادی اننگز کھیل کر کرس گیل کا عالمی ریکارڈ اپنے نام کرلیا۔پریٹوریئس نے جنوبی افریقا کی ملکی ٹی ٹوئنٹی لیگ سی ایس اے ٹی ٹوئنٹی چیلنج میں ٹائٹنز کی نمائندگی کرتے ہوئے نائٹس کے خلاف صرف 79 گیندوں پر ناقابلِ شکست 188 رنز بنائے۔بائیں ہاتھ کے اوپنر نے اپنی شاندار اننگز میں 15 چوکے اور 13 چھکے لگائے۔ وہ ٹی ٹوئنٹی کرکٹ میں ڈبل سنچری مکمل کرنے والے پہلے بلے باز بننے سے صرف 12 رنز کی دوری پر رہ گئے۔اس سے قبل ٹی ٹوئنٹی میں سب سے بڑی انفرادی اننگز کا ریکارڈ کرس گیل کے پاس تھا، جنہوں نے 2013ء میں انڈین پریمیئر لیگ کے دوران رائل چیلنجرز بنگلورو کی جانب سے کھیلتے ہوئے پونے واریئرز کے خلاف ناقابلِ شکست 175 رنز بنائے تھے۔پریٹوریئس کی ریکارڈ ساز اننگز کی بدولت ٹائٹنز نے 3 وکٹوں کے نقصان پر 267 رنز بنائے، جو سی ایس اے ٹی ٹوئنٹی چیلنج کی تاریخ کا دوسرا بڑا مجموعہ بھی ہے۔مردوں کی ٹی ٹوئنٹی کرکٹ میں بڑے انفرادی اسکور بنانے والوں میں لوہان ڈرے پریٹوریئس 188 ناٹ آؤٹ، کرس گیل 175 ناٹ آؤٹ، ایرون فنچ 172، کرن بیر سنگھ 164 اور حمزہ خان 164 ناٹ آؤٹ کے ساتھ شامل ہیں۔
