لاہور ( سپورٹس ڈیسک)پرتگال کے عالمی شہرت یافتہ فٹبالر کرسٹیانو رونالڈو نے دولت کے میدان میں بھی نئی تاریخ رقم کردی، وہ فٹبال کی تاریخ کے پہلے کھلاڑی بن گئے ہیں جن کے اثاثوں اور آمدنی نے ملٹی بلینیئر کی سطح عبور کرلی ہے۔امریکی جریدے فوربز کے مطابق، 41 سالہ رونالڈو نے گزشتہ ایک سال کے دوران تقریباً 22 کروڑ 50 لاکھ پاؤنڈ کمائے۔ سعودی فٹبال کلب النصر کی جانب سے انہیں روزانہ تقریباً 4 لاکھ 88 ہزار پاؤنڈ معاوضہ ملتا ہے، جبکہ اشتہارات اور کاروباری سرگرمیوں سے انہوں نے مزید 4 کروڑ 20 لاکھ پاؤنڈ حاصل کیے۔فوربز کی امیر ترین فٹبالرز کی فہرست میں ارجنٹائن کے اسٹار لیونل میسی دوسرے نمبر پر ہیں، جن کی سالانہ آمدنی تقریباً 10 کروڑ 90 لاکھ پاؤنڈ رہی۔فرانس کے معروف فٹبالر کائیلیان ایمباپے 7 کروڑ 50 لاکھ پاؤنڈ کی آمدنی کے ساتھ تیسرے نمبر پر ہیں، جبکہ مانچسٹر سٹی کے ایرلنگ ہالینڈ چوتھے اور ریال میڈرڈ کے وینیسیئس جونیئر پانچویں نمبر پر رہے۔ ہسپانوی نوجوان اسٹار لامین یامال نے فہرست میں چھٹی پوزیشن حاصل کی۔رپورٹ کے مطابق، رونالڈو اور میسی گزشتہ 13 برسوں کے دوران 12 مرتبہ اس فہرست کے ابتدائی دو مقامات پر جگہ بنا چکے ہیں، جو دونوں کھلاڑیوں کی مسلسل مالی کامیابی اور عالمی مقبولیت کو ظاہر کرتا ہے۔
