چھاتی کے کینسر سے آگاہی مہم، پاکستانی ٹیم انگلینڈ کے خلاف ون ڈے میں گلابی کٹ پہنے گی

لاہور ( سپورٹس ڈیسک)پاکستان کرکٹ بورڈ (پی سی بی) نے لاہور میں پاکستان اور انگلینڈ کے درمیان ہونے والے ون ڈے انٹرنیشنل میچ کو خواتین میں چھاتی کے کینسر سے آگاہی کے لیے مختص کر دیا ہے۔پی سی بی کے مطابق، پاکستانی ٹیم 25 اکتوبر کو انگلینڈ کے خلاف میچ میں خصوصی گلابی کٹ پہن کر میدان میں اترے گی۔ یہ اقدام پی سی بی اور پنک ربن کی چھاتی کے کینسر سے متعلق آگاہی پھیلانے کی مشترکہ کوشش کا حصہ ہے۔اس مہم کے تحت پی سی بی نے خصوصی فین شرٹس کی نیلامی کا اعلان بھی کیا ہے، جن پر قومی ٹیم کے اسٹار کھلاڑی شاہین آفریدی اور بابر اعظم کے دستخط ہوں گے۔بورڈ کے مطابق، نیلامی سے حاصل ہونے والی رقم چھاتی کے کینسر سے متاثرہ خواتین کے علاج پر خرچ کی جائے گی، خصوصاً ان خواتین کی مدد کی جائے گی جو علاج کے اخراجات برداشت کرنے کی استطاعت نہیں رکھتیں۔پی سی بی کا کہنا ہے کہ اس اقدام کے ذریعے شائقین کو دستخط شدہ خصوصی شرٹس حاصل کرنے کے ساتھ ساتھ متاثرہ خواتین کی معاونت اور قیمتی جانیں بچانے کی کوششوں میں حصہ لینے کا موقع بھی ملے گا۔