20 ہزار کنٹینرز کی گنجائش رکھنے والا میگا جہاز کراچی بندرگاہ پر لنگر انداز

کراچی( کامرس ڈیسک) دنیا کے بڑے کنٹینر بردار جہازوں میں شامل ایم ایس سی ایریکا کراچی پورٹ پر لنگر انداز ہو گیا ہے، جسے بندرگاہی سرگرمیوں اور بحری تجارت کے لیے اہم پیش رفت قرار دیا جا رہا ہے۔کراچی پورٹ ٹرسٹ کے مطابق 398.5 میٹر طویل اور 59 میٹر چوڑے اس میگا کنٹینر جہاز میں تقریباً 20 ہزار ٹی ای یوز کنٹینرز لے جانے کی صلاحیت موجود ہے۔پورٹ حکام کے مطابق جہاز کا مجموعی اندرونی حجم ایک لاکھ 94 ہزار 308 میٹرک ٹن ہے، جبکہ اس کا ڈرافٹ 12 میٹر ہے۔کے پی ٹی کے مطابق ایم ایس سی ایریکا سے کراچی پورٹ پر 3 ہزار سے زائد کنٹینرز کی ہینڈلنگ متوقع ہے۔ کارگو آپریشن مکمل ہونے کے بعد جہاز اپنی اگلی منزل چین کے لیے روانہ ہو جائے گا۔پورٹ انتظامیہ کا کہنا ہے کہ اتنے بڑے کنٹینر بردار جہاز کی کراچی آمد بندرگاہ کی بڑھتی ہوئی استعداد، جدید سہولیات اور عالمی بحری تجارت میں پاکستان کے اہم کردار کی عکاسی کرتی ہے۔