ممبئی( شو بز ڈیسک)بالی ووڈ اداکارہ تاپسی پنوں کی ماضی میں پاپارازی، یعنی فوٹوگرافرز، کے ساتھ متعدد مرتبہ تلخ کلامی ہوچکی ہے، تاہم وہ ہمیشہ اپنی ذاتی حدود برقرار رکھنے پر زور دیتی رہی ہیں۔تاپسی کو کئی بار فوٹوگرافرز کے ساتھ بحث کرتے دیکھا گیا، جس کے باعث ان کا موازنہ سینئر اداکارہ جیا بچن سے بھی کیا جاتا ہے۔ جیا بچن نجی زندگی میں فوٹوگرافرز کی مداخلت کے خلاف کھل کر اظہار خیال کرتی رہی ہیں۔ایک حالیہ گفتگو میں دہلی سے تعلق رکھنے والی 39 سالہ تاپسی پنوں نے جیا بچن سے موازنے پر کہا کہ انہیں ’دوسری جیا بچن‘ یا ’جیا بچن لائٹ‘ کہنا ان کے لیے اعزاز ہے۔ ان کے مطابق جیا بچن ایک بہترین اداکارہ اور مضبوط شخصیت کی مالک ہیں، اس لیے ان سے موازنہ ہونا ان کی پذیرائی کے مترادف ہے۔پاپارازی کے ساتھ اپنے رویے کا دفاع کرتے ہوئے تاپسی نے کہا کہ انہیں اس بات کی کوئی پروا نہیں۔ ان کا کہنا تھا کہ انہوں نے کبھی کسی پر چیخ کر بات نہیں کی اور نہ ہی کسی کو گالی دی ہے۔ ان کے مطابق ایسی خاتون جس کی اپنی حدود بالکل واضح ہوں، بہت سے لوگوں کے لیے خوفزدہ کن ہوسکتی ہے۔تاپسی نے بتایا کہ وہ لوگوں کے چیخنے چلانے کی عادی نہیں، اسی لیے جب پاپارازی ان کا نام زور سے پکارتے ہیں تو انہیں یہ رویہ ناگوار گزرتا ہے۔اداکارہ نے مزید کہا کہ فوٹوگرافرز کا خیال ہے کہ وہ ان پر غصہ کرتی ہیں، حالانکہ جب وہ حقیقتاً ناراض ہوتی ہیں تو ان کا ردعمل غصے کے بجائے مکمل خاموشی اختیار کرنا ہوتا ہے۔
