لاہور ( سپورٹس ڈیسک) آئی سی سی اور جنوبی افریقی کرکٹ بورڈ ون ڈے ورلڈکپ 2027 کے شیڈول کا اعلان یکم اکتوبر کو کیپ ٹاؤن میں کریں گے، جبکہ اسی تقریب کے دوران ٹکٹوں کی رجسٹریشن بھی شروع کی جائے گی۔تفصیلات کے مطابق ورلڈکپ کا آغاز 2 اکتوبر سے متوقع ہے، جبکہ میگا ایونٹ کا فائنل 21 نومبر کو کھیلا جائے گا۔ٹورنامنٹ میں مجموعی طور پر 14 ٹیمیں حصہ لیں گی، جن میں سے 10 ٹیموں کی شناخت 30 ستمبر تک مکمل ہوجائے گی۔میزبان جنوبی افریقا اور زمبابوے براہ راست ورلڈکپ کیلئے کوالیفائی کرچکے ہیں، جبکہ دیگر 8 ٹیموں کا انتخاب آئی سی سی ون ڈے رینکنگ کی بنیاد پر ہوگا۔موجودہ صورتحال کے مطابق بھارت، نیوزی لینڈ، پاکستان، آسٹریلیا، انگلینڈ، سری لنکا، افغانستان اور بنگلادیش رینکنگ کے ذریعے کوالیفائی کرنے کی پوزیشن میں ہیں۔ویسٹ انڈیز کو ورلڈکپ میں جگہ بنانے کیلئے کوالیفائرز کے مرحلے سے گزرنا ہوگا، جبکہ نمیبیا کی براہ راست شرکت ابھی یقینی نہیں ہے۔آئی سی سی یکم اکتوبر سے ورلڈکپ ٹکٹوں کیلئے قرعہ اندازی کے عمل کا آغاز بھی کرے گا۔ شائقین فوری طور پر ٹکٹ خریدنے کے بجائے پہلے قرعہ اندازی کیلئے اپنی رجسٹریشن کراسکیں گے۔
