مظفرآباد( پاکستان خبر) آزاد جموں و کشمیر کے عام انتخابات 2026 کے پہلے مرحلے میں ہزاروں سرکاری ملازمین آج اپنا حق رائے دہی استعمال کر رہے ہیں۔آزاد کشمیر قانون ساز اسمبلی کی 33 نشستوں میں سے 26 نشستوں پر انتخابات 27 جولائی کو ہوں گے، جس کے لیے پہلے مرحلے میں 8 اضلاع کے تقریباً 30 ہزار سرکاری ملازمین اپنے متعلقہ حلقوں کے لیے ووٹ کاسٹ کر رہے ہیں۔انتخابی عمل کے دوران سکیورٹی کے سخت انتظامات کیے گئے ہیں، جہاں پولیس کے ساتھ فرنٹیئر کور کے اہلکار بھی فرائض انجام دے رہے ہیں۔حکام کے مطابق سرکاری ملازمین کے ووٹوں کے لیے ضلعی ریٹرننگ افسران کے دفاتر کو پولنگ مراکز قرار دیا گیا ہے، جبکہ ان ووٹوں کی گنتی عام انتخابات کے نتائج کے ساتھ ہی کی جائے گی۔27 جولائی کو ہونے والے انتخابات میں مجموعی طور پر 33 لاکھ 65 ہزار 839 رجسٹرڈ ووٹرز اپنا حق رائے دہی استعمال کریں گے، جن میں 17 لاکھ 53 ہزار 933 مرد اور 16 لاکھ 11 ہزار 906 خواتین ووٹرز شامل ہیں۔چیف الیکشن کمشنر آزاد کشمیر جسٹس غلام مصطفیٰ مغل نے انتخابی تیاریوں کا جائزہ لینے کے لیے مختلف پولنگ مراکز کا دورہ کیا۔ انہوں نے انتخابات ملتوی ہونے سے متعلق افواہوں کو مسترد کرتے ہوئے واضح کیا کہ پولنگ مقررہ وقت پر ہی ہوگی۔
