کوئٹہ( پاکستان خبر)پاک فوج، ایف سی بلوچستان اور پولیس کی جانب سے دہشت گردوں کے خلاف مشترکہ آپریشن شعبان بھرپور انداز میں جاری ہے، جس کے دوران مزید 9 دہشت گردوں کو ہلاک کر دیا گیا۔سیکیورٹی ذرائع کے مطابق فتنہ الخوارج سے تعلق رکھنے والے دہشت گردوں کے خلاف مؤثر کارروائیاں کی جا رہی ہیں، تازہ آپریشنز میں 9 دہشت گردوں کو نشانہ بنایا گیا۔ذرائع کا کہنا ہے کہ سیکیورٹی فورسز نے دشوار گزار پہاڑی علاقوں اور دور دراز مقامات پر چھپے دہشت گردوں کے خلاف فضائی اور زمینی کارروائیاں کیں۔سیکیورٹی حکام کے مطابق آپریشن شعبان کے دوران اب تک ہلاک ہونے والے دہشت گردوں کی تعداد 52 تک پہنچ گئی ہے، جبکہ 5 جولائی سے جاری آپریشن شعبان اور دیگر خفیہ اطلاعات پر مبنی کارروائیوں میں مجموعی طور پر 88 دہشت گرد مارے جا چکے ہیں۔سیکیورٹی ذرائع نے کہا ہے کہ بلوچستان میں آخری دہشت گرد کے خاتمے تک آپریشن شعبان جاری رکھا جائے گا۔وزیراعظم شہباز شریف نے سیکیورٹی فورسز کی کامیابیوں کو سراہتے ہوئے کہا کہ دہشت گردی کے ناسور کو جڑ سے ختم کیا جائے گا۔وفاقی وزیر داخلہ محسن نقوی نے پاک فوج، ایف سی بلوچستان اور پولیس کو خراج تحسین پیش کرتے ہوئے کہا کہ بہادر فورسز نے دشمن کے مذموم عزائم ناکام بنا دیے ہیں۔انہوں نے کہا کہ دہشت گرد ملک اور قوم کے لیے خطرہ ہیں، ان کا مکمل خاتمہ ضروری ہے، امن دشمن عناصر کو کہیں بھی چھپنے کی اجازت نہیں دی جائے گی۔
