ممبئی( شو بز ڈیسک)بالی ووڈ کی مقبول فلم ’’دل چاہتا ہے‘‘ کی ریلیز کو 25 برس مکمل ہونے پر فلم کی کاسٹ اور ٹیم نے شوٹنگ کے دوران پیش آنے والے دلچسپ واقعات یاد کیے، جن میں عامر خان کو ایک منظر کے لیے 17 مرتبہ حقیقی تھپڑ مارے جانے کا انکشاف بھی سامنے آیا۔فلم کے ہدایت کار فرحان اختر نے بتایا کہ ایک اہم منظر میں اکشے کھنہ کے کردار ’’سد‘‘ کو عامر خان کے کردار ’’آکاش‘‘ کو تھپڑ مارنا تھا۔ حیران کن طور پر اس منظر میں استعمال ہونے والے تھپڑ نقلی نہیں تھے بلکہ حقیقت میں مارے گئے تھے۔عامر خان کے مطابق مختلف کیمرا زاویوں اور مناظر کے لیے یہ منظر 17 مرتبہ فلمایا گیا اور ہر مرتبہ اکشے کھنہ نے انہیں حقیقت میں تھپڑ مارا۔فرحان اختر نے بتایا کہ ابتدا میں صرف دور سے فلمائے جانے والے منظر کے لیے حقیقی تھپڑ مارنے کا فیصلہ کیا گیا تھا، تاہم منظر کے جذباتی اثر کو دیکھتے ہوئے عامر خان نے خود باقی مناظر میں بھی حقیقی تھپڑ کھانے پر رضامندی ظاہر کی۔ان کے مطابق حقیقی تھپڑ سے عامر خان کو کردار کی جذباتی کیفیت برقرار رکھنے میں مدد مل رہی تھی۔ شوٹنگ مکمل ہونے تک عامر خان کے چہرے کے ایک جانب سوجن آگئی تھی اور تھپڑوں کے واضح نشانات بھی موجود تھے۔
