والد سے متعلق سنگین الزامات پر میگھن مارکل رنجیدہ، بچوں کے تحفظ پر تشویش

 لندن(شو بز ڈیسک) برطانوی شاہی خاندان سے علیحدگی اختیار کرنے والے شہزادہ ہیری کی اہلیہ اور امریکی اداکارہ میگھن مارکل اپنے والد تھامس مارکل سینئر کے خلاف بچوں سے متعلق سنگین الزامات سامنے آنے پر شدید رنجیدہ ہیں۔برطانوی جریدے ہیلو کے مطابق میگھن اپنے شوہر ہیری اور بچوں، 7 سالہ آرچی اور 5 سالہ للیبیٹ کے ہمراہ مختصر تعطیلات کے لیے بیرونِ ملک چلی گئی ہیں، جہاں وہ میڈیا کی توجہ سے دور رہ کر قریبی دوستوں کے ساتھ وقت گزارنا چاہتی ہیں۔رپورٹ کے مطابق میگھن کے سوتیلے بھائی تھامس جونیئر نے دعویٰ کیا ہے کہ انہیں اپنے والد کے سامان سے بچوں کے جنسی استحصال پر مبنی تصاویر ملی ہیں۔غیر ملکی میڈیا کے مطابق میگھن اس معاملے پر شدید افسردہ ہیں اور اپنی بیٹی کو دیکھ کر متاثرہ بچوں کے بارے میں سوچتے ہوئے آبدیدہ بھی ہوگئیں۔ ان کے دوست احباب بھی پیغامات کے ذریعے ان سے ہمدردی کا اظہار کر رہے ہیں۔واضح رہے کہ میگھن مارکل اور ان کے والد کے درمیان 2018 سے تعلقات منقطع ہیں۔ حالیہ تنازع پر اپنے بیان میں میگھن نے کہا تھا کہ والد کو اپنے بچوں سے دور رکھنے کا فیصلہ ان کے تحفظ کے پیش نظر کیا گیا تھا۔ انہوں نے امید ظاہر کی کہ حکام دیگر خاندانوں کے بچوں کی حفاظت کے لیے بھی اقدامات کر رہے ہوں گے۔