ممبئی( شوبز ڈیسک)بالی ووڈ کے معروف اداکار عامر خان نے اپنے بیٹے جنید خان کی آنے والی رومانوی فلم ایک دن میں تخلیقی کردار ادا کرتے ہوئے فلم کا اختتام خود دوبارہ تحریر کر دیا ہے۔فلم ساز منصور خان نے ایک حالیہ انٹرویو میں انکشاف کیا کہ عامر خان کو فلم کے کلائمکس پر تحفظات تھے، جس کے بعد انہوں نے اسے ازسر نو تحریر کیا۔ ان کے مطابق پوری ٹیم نے اس تبدیلی سے اتفاق کیا اور اسے ایک مثبت پیشرفت قرار دیا۔منصور خان کا کہنا تھا کہ یہ عمل ٹیم ورک کی بہترین مثال ہے، جہاں ایک بہتر نتیجے کے لیے سب نے مل کر فیصلہ کیا۔ فلم میں جنید خان کے ساتھ سائی پلوی مرکزی کردار ادا کر رہی ہیں، جو اس فلم کے ذریعے بالی ووڈ میں اپنی پہلی انٹری دے رہی ہیں۔فلم کی ہدایت کاری سنیل پانڈے کر رہے ہیں جبکہ اسے عامر خان پروڈکشنز کے تحت منصور خان اور اپرنا پروہت کے اشتراک سے پیش کیا جا رہا ہے۔
