عامر خان کی بھانجی زین میری نے پولیس حراست کے بعد جسم پر چوٹوں کے نشانات دکھا دیے

ممبئی( شو بز ڈیسک)بالی وڈ اداکار عامر خان کی بھانجی زین میری نے ممبئی میں احتجاج کے دوران پولیس حراست میں لیے جانے کے بعد اپنے جسم پر موجود چوٹوں کے نشانات کی ویڈیو سماجی ذرائع ابلاغ پر شیئر کر دی۔زین میری نے انسٹاگرام پر جاری ویڈیو میں اپنے بازوؤں، انگلیوں اور ٹانگوں پر موجود نشانات دکھائے۔ ویڈیو کے ساتھ انہوں نے لکھا کہ وہ انٹرنیٹ پر ریاستی اقدامات کو بے نقاب کرتی ہیں اور انہیں اتنا خوف زدہ نہ کیا جائے کہ خوف کا احساس ہی باقی نہ رہے۔اداکارہ ہفتے کے روز ممبئی کے آگست کرانتی میدان میں ہونے والے احتجاج میں شریک تھیں۔ مظاہرین چیف الیکشن کمشنر گیانیش کمار کو عہدے سے ہٹانے اور انتخابی فہرستوں سے مبینہ طور پر نام خارج کیے جانے کے معاملے پر ووٹ دینے کا حق بحال کرنے کا مطالبہ کر رہے تھے۔زین میری نے اس سے قبل اداکار عمران خان اور لیکھا واشنگٹن کے ہمراہ حراست میں لیے جانے کی ویڈیوز بھی شیئر کی تھیں۔ پولیس تینوں اداکاروں کو ایک گاڑی میں لے گئی، تاہم چند گھنٹوں بعد رہائی ملنے پر انہوں نے اپنے تجربات سوشل میڈیا پر بیان کیے۔عمران خان نے اپنی ویڈیو میں دعویٰ کیا کہ انہیں حراست میں لیے جانے کی وجہ نہیں بتائی گئی۔ ان کے مطابق پولیس اہلکار انہیں اور دیگر افراد کو سڑک سے اٹھا کر گاڑی میں لے گئے اور تقریباً دو گھنٹے تک مختلف مقامات پر گھمانے کے بعد ایک نامعلوم مقام پر اتار دیا۔رپورٹ کے مطابق ممبئی پولیس نے آگست کرانتی میدان اور قریبی علاقے نانا چوک میں ہونے والے احتجاج کے دوران عمران خان سمیت ۴۰۰ سے زائد افراد کو حراست میں لیا تھا۔ یہ مظاہرہ مہاتما گاندھی کے پڑپوتے توشار گاندھی کی اپیل پر کیا گیا تھا، جس میں انتخابی فہرستوں پر نظرِ ثانی اور ووٹروں کے ناموں میں مبینہ ردوبدل کے خدشات پر چیف الیکشن کمشنر سے استعفے کا مطالبہ کیا گیا۔توشار گاندھی کو بھی احتجاج کے مقام کی جانب جاتے ہوئے حراست میں لیا گیا، تاہم بعد میں انہیں رہا کر دیا گیا۔دوسری جانب کاکروچ جنتا پارٹی نے انتخابی فہرستوں اور ووٹر اندراج کے طریقۂ کار میں تبدیلیوں کے خلاف نئی دہلی کے جنتر منتر پر بھی احتجاج کا اعلان کیا تھا۔ رپورٹ کے مطابق تحریک کے بانی ابھیجیت دیپکے اور ان کے ساتھیوں کو نئی دہلی پہنچنے پر حراست میں لیا گیا، جبکہ اپوزیشن رہنماؤں، صحافیوں اور وکلا سمیت بڑی تعداد میں دیگر افراد کو بھی پولیس نے حراست میں لیا۔