آمنہ ملک کی گھر میں جنات کی موجودگی سے متعلق بیان پر وضاحت سامنے آگئی

کراچی( شوبز ڈیسک)پاکستانی اداکارہ آمنہ ملک نے اپنے گھر میں جن کی موجودگی سے متعلق گفتگو پر وضاحت پیش کرتے ہوئے واقعے کی تفصیلات بیان کردی ہیں۔اداکارہ نے حال ہی میں سماجی رابطے کی ویب سائٹ انسٹاگرام پر ایک ویڈیو جاری کی، جس میں انہوں نے گھر میں جن کو قابو کرنے سے متعلق اپنے سابقہ بیان کی وضاحت کی۔آمنہ ملک کے مطابق وہ جیو نیوز کے پروگرام ’’ہنسنا منع ہے‘‘ میں شریک ہوئی تھیں، جہاں میزبان تابش ہاشمی نے ان سے پوچھا تھا کہ کیا انہیں کبھی غیر معمولی یا مافوق الفطرت سرگرمیوں کا تجربہ ہوا ہے۔اداکارہ نے بتایا کہ جواب میں انہوں نے اپنے ساتھ پیش آنے والے ایک واقعے کا ذکر کیا تھا، جب ان کے پیسے اور دیگر اشیا غائب ہونے لگی تھیں۔ان کا کہنا تھا کہ انہوں نے سنا تھا کہ اگر کسی گھر میں چھوٹے جنات موجود ہوں تو وہ ایسی شرارتیں کرتے ہیں اور انہیں چیزیں واپس کرنے کے لیے کہا جائے تو وہ ایسا بھی کرسکتے ہیں۔