گلوکار عبدالحنان: ’خسارہ‘ کسی ایک شخص نہیں بلکہ زندگی کے تجربات سے متاثر ہو کر لکھا

لاہور( شوبز ڈیسک) نوجوان گلوکار عبدالحنان نے اپنے مقبول گیت "خسارہ" کے حوالے سے دلچسپ انکشافات کرتے ہوئے بتایا ہے کہ اس گانے کا خیال کسی خاص واقعے یا شخصیت سے نہیں بلکہ زندگی کے عمومی تجربات سے پیدا ہوا۔عبدالحنان نے جیو پوڈ کاسٹ میں شرکت کے دوران اپنی پیشہ ورانہ زندگی، موسیقی اور گیت "خسارہ" کی تخلیق کے بارے میں گفتگو کی۔گلوکار نے بتایا کہ "خسارہ" کا خیال اس وقت آیا جب اس کے لیے کوئی شاعری بھی موجود نہیں تھی۔ یہ منصوبہ تقریباً ڈیڑھ سال پرانا ہے، ابتدا میں صرف ایک دھن ذہن میں تھی اور اس کے علاوہ کچھ نہیں تھا۔انہوں نے کہا کہ ایک دن جب انہوں نے اس دھن کو غور سے سنا تو انہیں محسوس ہوا کہ یہ کسی نقصان یا محرومی کے احساس کو بیان کر رہی ہے، جیسے کسی چیز کے کھو جانے کا درد دل سے موسیقی کی صورت میں ظاہر ہو رہا ہو۔عبدالحنان کا کہنا تھا کہ گیت کی دھن تیار کرتے وقت ان کے ذہن میں کوئی مخصوص شخص موجود نہیں تھا۔ وہ اپنی اور دوسروں کی زندگی کے تجربات کو سامنے رکھتے ہوئے لکھتے ہیں، کیونکہ "خسارہ" کا مطلب ہر انسان کے لیے مختلف ہو سکتا ہے۔انہوں نے کہا کہ نقصان صرف کسی ایک چیز تک محدود نہیں، یہ زندگی کے کسی بھی پہلو سے متعلق ہو سکتا ہے، اور یہی احساس اس گیت کی بنیاد بنا۔