لاہور ( سپورٹس ڈیسک)ایشین گیمز کے مردوں کے کرکٹ مقابلے میں پاکستان نے بنگلادیش کو 6 وکٹوں سے شکست دے کر پہلی مرتبہ فائنل میں جگہ بنا لی۔بارش کے باعث سیمی فائنل کو 13، 13 اوورز فی اننگز تک محدود کردیا گیا۔ پاکستان نے ٹاس جیت کر بنگلادیش کو پہلے بیٹنگ کی دعوت دی۔بنگلادیشی ٹیم نے مقررہ 13 اوورز میں 7 وکٹوں کے نقصان پر 111 رنز بنائے۔ توحید ہریدوئے 42 رنز کے ساتھ اپنی ٹیم کے نمایاں بلے باز رہے۔پاکستان کی جانب سے سفیان مقیم نے 3 کھلاڑیوں کو آؤٹ کیا، جبکہ عرفات منہاس نے 2 اور صائم ایوب نے ایک وکٹ حاصل کی۔112 رنز کے ہدف کے تعاقب میں پاکستان کا آغاز اچھا نہ رہا اور 53 رنز تک پہنچتے پہنچتے اس کی 4 وکٹیں گر چکی تھیں۔ صائم ایوب نے 21، معاذ صداقت نے 15، عثمان خان نے 14 جبکہ کپتان صاحبزادہ فرحان نے ایک رن بنایا۔اس موقع پر عبدالصمد اور حسن نواز نے ذمہ دارانہ بیٹنگ کرتے ہوئے 59 رنز کی ناقابل شکست شراکت قائم کی۔ عبدالصمد نے 30 جبکہ حسن نواز نے 27 رنز بنائے اور پاکستان نے ہدف 11.3 اوورز میں 4 وکٹوں کے نقصان پر حاصل کرلیا۔یوں پاکستان نے 6 وکٹوں سے کامیابی حاصل کرکے ایشین گیمز کے مردوں کے کرکٹ مقابلے کے فائنل میں پہلی مرتبہ رسائی حاصل کرلی۔
