نشے کی حالت میں سیٹ پر آنے والے فنکاروں پر پابندی ہونی چاہیے، محسن عباس حیدر

 لاہور( شوبز ڈیسک)پاکستانی شوبز انڈسٹری سے تعلق رکھنے والے اداکار، گلوکار اور لکھاری محسن عباس حیدر نے کہا ہے کہ بعض اداکار، اداکارائیں اور ہدایت کار نشے کی حالت میں شوٹنگ سیٹس پر آتے ہیں، جن پر سخت پابندی عائد ہونی چاہیے۔ایک حالیہ پروگرام میں گفتگو کرتے ہوئے انہوں نے کہا کہ انہوں نے سوشل میڈیا پر ایک پوسٹ شیئر کی تھی جس میں مطالبہ کیا گیا تھا کہ ایسے افراد کو کام کرنے کی اجازت نہیں ہونی چاہیے جو نشے کی حالت میں سیٹ پر آئیں۔ان کے مطابق پوسٹ کے بعد ایک پروڈکشن ہاؤس کی جانب سے ان سے رابطہ کیا گیا اور پوچھا گیا کہ آیا وہ کسی مخصوص پراجیکٹ یا فنکار کی طرف اشارہ کر رہے ہیں۔ محسن عباس حیدر نے اس بات کی تصدیق کی، جس پر پروڈکشن ٹیم نے معاملے کی مکمل تحقیقات کی یقین دہانی کرائی۔اداکار کا کہنا ہے کہ شوبز انڈسٹری میں پروفیشنل رویے کو یقینی بنانے کے لیے ایسے اقدامات ضروری ہیں تاکہ کام کے ماحول کو بہتر اور ذمہ دار بنایا جا سکے۔