لاہور( شوبز ڈیسک)معروف پاکستانی اداکارہ میرا اور ان کی گھریلو ملازمہ کے درمیان مبینہ تلخ کلامی اور ہاتھا پائی کی ایک ویڈیو سوشل میڈیا پر گردش کررہی ہے۔وائرل ویڈیو میں میرا کو اپنی ملازمہ سے گفتگو کرتے دیکھا جاسکتا ہے، تاہم کچھ دیر بعد دونوں کے درمیان صورتحال کشیدہ ہوجاتی ہے اور ہاتھا پائی شروع ہوجاتی ہے۔ملازمہ نے ایک انٹرویو میں الزام عائد کیا کہ اداکارہ نے اسے متعدد مرتبہ تشدد کا نشانہ بنایا، جس کے باعث اس کے چہرے اور جسم کے مختلف حصوں پر چوٹیں آئیں۔ ملازمہ نے اداکارہ کی ذہنی حالت پر بھی سوالات اٹھائے۔دوسری جانب میرا کی گھریلو ملازمہ یاسمین کی ایک اور ویڈیو سامنے آئی ہے، جس میں اس نے پہلے بیان سے مختلف مؤقف اختیار کرتے ہوئے کہا کہ اس کی سابقہ ویڈیو مصنوعی ذہانت کے ذریعے تیار کی گئی تھی۔ یاسمین نے میرا کو انتہائی اچھی خاتون قرار دیتے ہوئے کہا کہ وہ اب بھی ان کے گھر میں کام کررہی ہے۔واضح رہے کہ میرا ماضی میں بھی مختلف ویڈیوز اور بیانات کے باعث خبروں میں رہ چکی ہیں، جبکہ چند برس قبل ایک ٹی وی چینل پر میک اپ آرٹسٹ کو مبینہ تشدد کا نشانہ بنانے کے الزام میں بھی ان کا نام سامنے آیا تھا۔
