کیلیفورنیا( ویب ڈیسک)دنیا کی معروف اسپورٹس کمپنی ایڈیڈاس اور عالمی پیغام رسانی پلیٹ فارم واٹس ایپ نے فیفا ورلڈ کپ 2026 کے لیے ایک منفرد اور جدید اشتراک کا اعلان کیا ہے۔اس نئے اقدام کے تحت دنیا بھر میں استعمال ہونے والا فٹ بال ایموجی اب ورلڈ کپ کی سرکاری میچ بال ’’ٹرائی اونڈا‘‘ کی شکل اختیار کر لے گا، جس سے ڈیجیٹل گفتگو میں کھیل کی جھلک مزید نمایاں ہو جائے گی۔اس تبدیلی کے بعد واٹس ایپ پر جب بھی فٹ بال ایموجی استعمال کیا جائے گا تو وہ خودکار طور پر ’’ٹرائی اونڈا‘‘ کے ڈیزائن میں تبدیل ہو جائے گا، جس سے صارفین کو ایک نیا بصری تجربہ ملے گا۔ماہرین کے مطابق یہ اقدام فٹ بال کے شائقین کو جدید ڈیجیٹل انداز میں جوڑنے کی کوشش ہے، تاکہ میچز کا جوش و خروش روزمرہ چیٹس اور گفتگو کا حصہ بن سکے۔واضح رہے کہ فیفا ورلڈ کپ 2026 تاریخ میں پہلی بار تین ممالک میں مشترکہ طور پر منعقد کیا جا رہا ہے، اور اسی مناسبت سے آفیشل گیند کا نام ’’ٹرائی اونڈا‘‘ رکھا گیا ہے۔اس نام میں ’’ٹرائی‘‘ تین میزبان ممالک کی علامت ہے جبکہ ’’اونڈا‘‘ ایک لفظ ہے جس کے معنی لہر کے ہیں، جو فٹ بال کے جذبے اور ثقافتی امتزاج کو ظاہر کرتا ہے۔گیند کے ڈیزائن میں لہراتی ہوئی لکیریں شامل کی گئی ہیں جو تینوں ممالک کے درمیان کھیل کے جذبے اور اتحاد کی علامت ہیں۔
