سام آلٹمین کا اے آئی کی سکیورٹی خامیوں سے متعلق بڑھتے خطرات پر اظہارِ تشویش

 کیلیفورنیا( ویب ڈیسک) اوپن اے آئی کے چیف ایگزیکٹو سام آلٹمین نے مصنوعی ذہانت (اے آئی) کی سکیورٹی خامیاں تلاش کرنے کی بڑھتی صلاحیت پر تشویش ظاہر کی ہے۔ایک حالیہ انٹرویو میں سام آلٹمین نے کہا کہ اے آئی ٹیکنالوجی کو محفوظ اور الگ تھلگ کمپیوٹنگ ماحول، یعنی سینڈ باکسز تک محدود رکھنا مشکل ہوتا جا رہا ہے۔انہوں نے کہا کہ جب اے آئی ماڈل اپنی صلاحیتوں میں بہتری لانے لگتا ہے تو اس کے محفوظ ماحول سے باہر نکلنے کی علامات کا پتا لگانا بھی مشکل ہو سکتا ہے۔ ان کے مطابق نگرانی سے اضافی وقت ضرور ملتا ہے، لیکن حقیقی تحفظ کے لیے ضروری ہے کہ اے آئی انسانی اقدار کو اپنائے۔سام آلٹمین نے خبردار کیا کہ اس وقت اے آئی سے متعلق خطرات انتہائی سنگین ہیں، اس لیے ان کی روک تھام ابتدائی مراحل ہی میں کرنا ضروری ہے۔انہوں نے مزید کہا کہ اے آئی ماڈلز ہارڈویئر میں چھپی سکیورٹی خامیوں کو غیر معمولی مہارت سے تلاش کر سکتے ہیں۔ ان کے بقول ہیکرز ان صلاحیتوں کو استعمال کرکے ایسے سافٹ ویئر بگز بھی تیار کر سکتے ہیں جنہیں درست کرنا انتہائی مشکل ہو جائے۔