اسلام آباد ( ویب ڈیسک) گوگل میپس دنیا بھر میں کروڑوں افراد استعمال کرتے ہیں، بالخصوص اسمارٹ فونز پر راستے تلاش کرنے اور نیوی گیشن کے لیے، تاہم یہ ایپ فون کی بیٹری تیزی سے ختم کرنے کا سبب بھی بن سکتی ہے۔جی پی ایس، گرافکس کی تیاری اور راستہ دکھانے کے دوران اسکرین مسلسل روشن رہنے کے باعث گوگل میپس زیادہ بیٹری استعمال کرتا ہے۔لیکن اس ایپ کا کم استعمال کرنے والے افراد کی بیٹری بھی تیزی سے ختم ہو سکتی ہے، جس کی ایک عام وجہ لوکیشن تک رسائی کی اجازت ہر وقت فعال رکھنا ہے۔گوگل میپس کو پس منظر میں بھی لوکیشن تک رسائی حاصل ہو تو یہ ایپ بند ہونے کے باوجود صارف کی پوزیشن معلوم کرتی رہ سکتی ہے، جس سے بیٹری کی کھپت بڑھ سکتی ہے۔
